رسالة إلى الشعب المصري

مقال عامي أهديه لابن عمي المصري الذي لا يفهم إلا الكلام البلدي
طلقة موت .... للكاتب طارق رجب
من الهيئة العسكرية لمبارك .. كله تمام يا ريسنا!
فيشنا الهوامش ... وكله بقى في الحشوب التمام!
انتهى الأمر، وكلٌ إنكشفٌ وبان ، على رأي صاحبنا اللي مش فاكر اسمه في المسرحية إياها، وأضحى عمنا المخلوع وابنه الدلوع وأخيه علولا قاب قوسين أو أدنى من البراءة، وضاعت فلوسك يا عم صابر ، الشعب اللي صبر غلب في النهاية أخد ...! ولا بلاش لا يصح أن أقول ذلك ، ولكني محروق يا بلدي ، محروق يا شعبي من الذي يحدث طوال الوقت أتحدث وأكتب وأذهب إلى الجرائد ولا مجيب، فالكل متواطئ، فهم ينشرون المختلط المزيد على رأي عمنا اللمبي بعيدا عن الخطوط الحمراء، فهم يدمنون للأسف الشاي أبو لبن، أما الخطوط الحمراء يعدوها فقط للمخلوع اللي وقع، أما الهيئة العسكرية فهي اللي في السلطة مدّارية ومحمية، وهي التي لا زالت على الحجر لازم يتم مغازلتها وإلا ...! ، لذلك عليهم أن ينشروا كل ما هو مباح عنها، وكل ما هو غير مستباح عن مبارك فقط،أما الهيئة ف(نو) وألف ألف (نو) الخوض فيما هو غير مستباح، لذلك لم أجد طريقا إلا العودة إلى صفحتي ومدونتي على النت، فقد تعبت من الكتابة ومن الكلام كأنني أؤذن في مالطة، وقد قلت قبل الهنا بسنة محاكمة هيصة للواد بيصة، وهي موجودة على الصفحة وأوضحت أنها بُنيت على خطأ، وبعدها كشفت ألاعيب الديب وقلت ما قاله في الجلسة قبل الهنا بسنة يعنى كنت سابق مرافعته بثلاثة أسابيع ، محدش يقولي إزاي، فنحن نقرأ الأحداث قبل الهنا بسنة ، وهذه موهبة نشكر الله ونحمده عليها ، نأتي إلى الهيئة العسكرية، فكم من المقالات تحدثت فيها عنها وعن تواطؤها وعن ... وعن ...، وأيضا تحدثت في عدة أحاديث داخل ميدان التحرير وغيره ونقابة الصحفيين وغيرها نُقلت بعضها عبر الفضائيات والبعض الآخر ( بم ) لم يظهر وخاصة القناة الأولى والثانية والكورة مع شوبير، فلا ننسى شوبير وحكايته مع جمال مبارك ، الرجل كان واقفا معه وقفة رجالة ودخله لجنة السياسات، ثم المجلس الموقر مجلس عمنا سرور سيد قراره موافقون .. موافقة ، نعود إلى جدول الأعمال كيف نخرب مصر وكيف نسرق ونكت، كله بالقانون، وذهب إلى طنطا وعزاه في أبيه ووقف في الشادر يأخذ وياه العزا، ايه يا جماعة لازم يعمل بأصله معاه ، يطلع مين طارق ده اللي ينقل رأيه وتحليله السياسي ! . نعود إلى الهيئة الموقرة، فقد أخذت الشعب في حضنها وهدهدته وطيبت خاطره وملست على شعره وقعدت تحسسله لحد ما ساب في إيديها، وفهمته أنها معاه مش ضده، وأنها فقط ضد المخلوع ومن معه ، وأنها ستحاكمه ،وأنها سوف تعيد الأموال ، وأنها .. وأنها ... والشعب الغلبان صدق اللعبة، لكننا وقفنا وقلنا كتير وياما، الملعوب واضح يا جماعة، وقلنا في رسالة إلى المجلس العسكري : انتهى الدرس يا غبي ، وقلنا : الشعب يكاكي من البدلة الكاكي ، وقلنا : عفوا لن أزوج أمي من ضابط ، وقلنا : لا نريدك يا عسكر حتى لو كنت كحك بسكر، وقلنا : يا مشير اذهب قبل أمشير ، وقلنا : فات الميعاد ، وغيره كثير ولكن لا مجيب وكأنهم حاطين ودن من طين والثانية طين أزفت من الطين الأولاني، وظهر الملعوب أخيرا ، الفلوس لن تعود، بل أنه تم تهريب أكثر من مائة مليار دولار من لحظة ما مسكت الهيئة بتلابيب البلاد، وتم تجهيز المحاكمة اياها رغما عنه، فهم كانوا قد قرروا حمايته في شرم الشيخ، إلى أن هاج الشعب فاضطروا – خد بالك من اضطروا دي – أي مش بإرادتهم اضطروا إلى عقد المحاكمة ، وكانت نيتهم سودا أسود من قرن الخروب، إنها ستنتهي على مفيش ، وازاي تنتهي يا ولاد على مفيش نقول باللعب في الورق، ستف ستف في أوراق واحجب المهم وخبيه وافرمه في المفرمة، والعب في شرائط الفيديو ، والعب في الجلسة اياها، وخلي المحامين بالحق المدني ضعيفي النفوس يهيجوا المحكمة ، فيقوم عمنا القاضي الهمام وقرر جعلها سرية أو يمنع إذاعتها، ويذهب عمنا المشير يقول كلام زي الفل في رئيسه مبارك، ويذهب عمنا سليمان رايح جاي يقول كلام زي العسل في رئيسه، ويذهب الجنرال أنان يقول كلام متغمس بعسل سرياقوسي في رئيسه ، والنهاية لسة اصبروا شوية يا قرائي الأعزاء ، تم وقف المحاكمة شوية بلعبة الديب علشان تولع البلد في هذه الفترة في ماسبيرو ومحمد محمود والقصر والمجمع ، وفي كل مرة كانوا يتمنون حدوث ثورة مضادة تؤدي إلى حرب أهلية تؤدي إلى دخول العسكر وحدوث انقلاب حقيقي، لكن كل مرة ينكشف الملعوب فيضطروا إلى لم الدور إلى أن عادت المحاكمة من جديد وحدث اللعب المتين ووقف الديب يعوي ويقول على عينك يا تاجر، مبارك وولديه غلابة ومديونون ولا يملكون شيئا، ولم يأمر مبارك بإطلاق النار، ولم يسرق ولم يلعب ولم يصدر الغاز ولم يفسد ولم يتوانس ولم يخون، وليس له دور في أي دور فهو رئيس أهبل شرابة خرج ما بيفهمش حاجة ولا شاف أي حاجة، فهو كالبقرة الضاحكة، أنسيتم يا جماعة لاباش كيري ، وبالتالي الرجل ملاك يا عين أمه وداخل الجنة داخل ومعاه ولديه والشعب ده ظالم ومفتري وربنا سينتقم منه ويزيده ذل على ذله وفقر على فقره، وفوق ده وده هيدخله النار جزاء وفاقا عما فعله من ظلم في الراجل الطيب الملاك، ده اسمه مبارك يا جدعان ، هو فيه واحد اسمه مبارك سيدخل النار، إنما المصريون دول ، دول سوس مصيرهم أسود ومهبب ولا زم يدخلوا النار ، علشان يا عين أمهم أذكياء وبيفهموا ، علشان كده لازم ربنا يحاسبهم ، أما مبارك فغلبان عقله على قده ، والناس اللي حواليه هما اللي ولاد هرمة ، وضحكوا عليه ولبسوه الطاقية علشان ايه عنده حساسية وبيكح، أقول ايه تاني ، هفرقع يا بلدي من الغيط ، سامحوني المقالة دي كتبتها بلغة عامية لأنها خارجة من مصري سكندري ابن بلد مش وقت تزويق الكلام ، لازم الكلام يخرج كده علشان الكل يفهم واللي عمره ما فهم يفهم ، الشعب يا مصري اتهزم يا رجالة بالانجليزي والفرنساوي والطلياني والعبري والصيني كمان فوق البيع ، وانتصر مبارك بمساعدة الهيئة العسكرية وخرج براءة هو وولديه ، بتقولوا ايه يا قرائي الأعزاء، والله هو ده اللي هيحصل ، هي دي الحقيقة ، وكله في التمام يا ريسنا، والفلوس اتستفت بره ، ولو كنت هربت مائة مليار أو أكثر أنت وولديك ورجالتك بقو دلوقتي وأنت في ضيافة المحكمة 220 مليار دولار ويُسأل في ذلك مطرب العواطف الواد عاطف عطوفة بن عبيد أفندي ، الواد الطرب الذي باع القطاع العام والأعمال والأهمال العام وكله على ودنه ، ثم جلس في البنك العربي حيث قام بتهريب ما لذ وطاب من أموال الشعب المصري، والشعب ازداد جوعا وخليناه يمد ايد أمه لطوب الأرض، وبكره هنلحسه البلاط، وبعده هياكل عياله قبل ما ياكل بعضه، شفت احنا رجالتك ازاي، والفلوس اياها في الملاحات هناك، أنت فاهم طبعا نقصد إيه بالملاحات، وفيشنا عليها الهوامش ، وقام بيها الواد الدفاس وأبو دقشوم، وكله بقى في الحاشوب التمام يا ريسنا، وأنت عارف طبعا أن ده السيم ولا مؤاخذة علشان اللي بالي بالك من الشعب اياه اللي عايز يزاكي علينا ميعرفش بس أنت فاهم مش كده ، وسلملي على المصريين اللي هما ، ده احنا الرجالة الهمة المهمة اللي علينا العين بتدور، بس خليناهم ايه يا ريسنا، وحياتك بقو ميعرفوش ضهرهم من قفاهم، مش بقولك يا ريسنا إحنا برده هو ، إحنا وأنت واحد ، كل اللي كنت عايز تعمله اتعمل وأكثر، أؤمر يا ريسنا، عايز ايه تاني، ندبحلك الشعب ، تحت أمرك، نقطعلك لسانه من لغلوغه ، في إيدينا ، إن كان على الواد الأهبل المعتوه اللي اسمه طارق رجب ده اللي بيكتب الكلام ده ميكونش في بالك يا سيدي أنا ، مش هيصبح عليه صبح ، قضية تتضبط ، شيكات ، اغتصاب ، آه ، قضية مخدرات ، لا ده حمار مش بيشرب حتى سجاير ، آه مفيش إلا جاسوس، الآه اكتشفنا يا شعبنا الهمام أن المدعو طارق رجب جاسوس اسرائيلي ، لأ ما ينفعش ده بيهاجم إسرائيل وكتب هل اسرائيل تتناول حبوب الصراصير ؟ طب عميل أمريكي ، برده مينفعش ، ده بيهاجم أمريكا وبيقول عليها هبلة ولا بتستهبل ، وكتب مقال آخر ( ياختي عليها ما راحت عليها وجت رجليها ) وبهدل كلينتون وأوباما ، وقال إنه نصاب عالمي ، وبيكتب عنه دلوقتي كتاب اسمه (عندما يبكي الغزال بعد كيد العزال) ، طب نقوله بيتعامل مع قناة الجزيرة وقطر ، لأ برده قفلها علينا ابن اللئيمة وكتب ( قطر والحب تحت المطر ) وكتب ( العلبة دي فيها ايه .. فيها قطر) ... و( من علامات الساعة ظهور قطر واسرائيل على الساحة ) طب نعمل في أمه ايه ده بقى ، آه جاسوس ، بس بيتجسس على الأموات المصرييين، هو مش قال إن أمه طلعت من التربة وهي اللي ولعت في المجمع ، وكما قال إن أمه هي اللهو الخفي ، وهي الطرف الثالث، خلاص ... آدي ده اعتراف منه إن أمه طلعت من التربة وعملت كل الأحداث السابقة دي اللي مش لاقيين ليها سبب ، يبقى هو وأمه هما اللهو الخفي، وهما الطرف الثالث ، أخيرا وقعت يا طارق أنت وأمك ، بس فيه برده مشكلة، لو قبضنا عليه هنقبض على أمه إزاي وهي مستخبية في التربة وعاملة نفسها ميتة، دي ولية لئيمة ، بس على مين ده إحنا الهيئة الموقرة اللي جابت الشعب المصري ومصر لورا، تعالى يا طارق يا ابن أم طارق، قولنا بقى ناكلك منين ؟!
خلص الكلام
وإلى لقاء في مقال قادم الكاتب طارق رجب