كلمات خارجة من القلب إلى قلوب أهل بلدي مصر ..... للكاتب / طارق رجب
هذه الكلمات موجهة إلى الدول العربية
مسجلة بالشهر العقاري منعا للسرقة والاقتباس
بحبك يا بلدي .. بحبك بجد .. وحبك في قلبي ماله حد
أول ما احسك ... ولم أسمع لحسك .. جسمي على طول يقشعر
وعيني تبكي .. وقلبي يشكي .. وعقلي على طول متحير
بيفكر ويسأل .. هو إيه الحل يا بلدي ؟!!!!!!
إزاي ترجعلك عافيتك ... إزاي يسيبوكي لما تبلي ريقك ....ببق ميه من نيلك
مش هقول يمسحوا دمعتك .. مش هقول يطبطبوا ... مش هقول يتأسفوا
مش هقول يرجعوا يبوسوا رجلك قبل إيدك
لكن بقول ..يسيبوكي تشمي نفسك شوية
لأجل ما تقفي على رجليكي من تاني ... وتحاجي على القريب والبعيد
ماهما في النهاية إخواتك الصغيرين
اللي يا ما شربوا من لبنك .. ونالوا من عطاياكي
ويا ما حطيتي في بقهم لقمتك ... وتنامي أنتي وأولادك خفاف من غير عشا
ولما يدلعوا عليكي ... على قلبك أحلى من العسل
لكن ... لما قولتي آي ... قالوا جاي .... مش تبعنا ما نعرفهاش !!
هي دي آخرتها ... ده أنا أمكم .. ولبني لسه في دمكم
ولو سألتم ربنا .. هو الوحيد اللي هيقولكم ... مين أنا... ومن غيري أنتم إيه!!!
ده أنا لو وقعت ... مش هيبقلكم سعر
وهتنداسوا ... وهتحتاسوا
لغتكم هتموت ... ورايتكم هتنكسر
ودين الله مش هيعبده مخلوق
أنا مش قاسية .... لكني مش ناسية
إني أمكم ... وأنكم إخواتي العاقين
ممكن أسامح ... لأجل ربي ما يسامح
ولأجل ما تعلى كلمته في الأراضين
فأنا اللي حامية الدين..
وأولادي هما خير الجنود أجمعين زي ما قال رب العالمين...
مفيش بعد كلامه كلام
فأنا الحامية
أنا المانعة
أنا اللي هفضل ليوم الساعة والدين ...
صاحية ... وواعية
بدافع عنكم وعن الدين ...
علشان كده .. أنا من الصابرين
عارفين ليه؟!!
ربي وربكم خلق الصبر عشاني أنا وكل ولادي اللي خرجوا من بطني أنا ...
يوم العرض أمام الرب من الصابرين...
غصب عنهم صابرين ... غصب عنهم ساجدين ...
غصب عنهم حاميين الدنيا والدين ...
علشان كده ربنا سماهم من فوق سبع سماوات المصريين...
No comments:
Post a Comment